Landkreis Deefholt

Wapen	Koort

Grunddaten
Bundsland:	Nedersassen
Kreisstadt:	Deefholt
Flach:	1.987,64 km²
Inwahners:	216.886 Inwahners (Stand 31. Oktober 2019)
Inwahnerdicht:	108
Kreisslötel:	03 2 51
Kfz-Kennteken:	DH
Updeelen:	47 Gemenen
Adress vun’n Kreisverwalten:	Niedersachsenstraße 2 49356 Deefholt
Websteed:	landkreis-diepholz.de
Landraad:	Gerd Stötzel (ohn Partei)
Koort

De Landkreis Deefholt is en Landkreis in de Midden vun Neddersassen. He hett 216.886 Inwahners (Stand 31. Oktober 2019).

Geografie

He grenzt in’n Noorden an Bremen, in’n Noordoosten un Oosten an den Landkreis Veern, in’n Süüdoosten un Süüd-Süüdoosten an den Landkreis Nienborg/Werser, in’n Süden an den Kreis Minnen-Lübbecke in Noordrhien-Westfalen, in’n Süüd-Süüdwesten un Westen an den Landkreis Ossenbrügge, in’n Süüdwesten un Westen an den Landkreis Vechte, in’n Noordwesten an den Landkreis Ollnborg un in’n Noord-Noordwesten an de kreisfree Stadt Demmost.

Historie

De Landkreis is noch nich oolt. 1977 sünd bi de Kreisreform in Neddersassen de beiden Landkreisen Landkreis Graafschop Hoya un Landkreis Graafschop Deefholt tohopenslaten wurrn. Dor kümmt ok dat hüdige Wapen vun her: De Lööw is dat Teken vun den Deefholter Graafen, de Boornklau fünn sik in dat Wapen vun de Grafen to Hoya.

Politik

Kreisdag

De Kreisdag sett sik so tohopen:

	CDU	SPD	FDP	GRÖÖN	Links.	Tohopen
2006	27	22	7	5	1	62

(Stand: Wahl an'n 10. September 2006)

Landrööt

1977–1986: Heinz Zurmühlen (CDU)
1986–1996: Josef Meyer (CDU)
1996–2001: Helmut Rahn (CDU)
siet 2001: Gerd Stötzel (ersten Landraad, de direkt wählt is un dat vun Beroop maakt; ohn Partei)

Verwalten

De Behöörd vun de Kreisverwalten is mit ehr verscheden Ämter („Fackdensten“) to'n groten Deel in dat Kreishuus in Deefholt ünnerbröcht. Lüttjere Delen vun de Verwalten finnt sik noch in dat Kreishuus in Syke (Slottweid/Amtshoff), man in dat Johr 2004 is de „Butenstell Syke“ to'n gröttsten Deel uplööst wurrn.

Baas vun de Verwalten weer vun 1977 bit 2001 de Överkreisdirektor (ÖKD). Vun 2001 af an is dat de Landraad, de direkt vun de Inwahners wählt wurrn is un de dat ok as Beroop utöven deit.

Överkreisdirektoren

1977–2001: Hans-Michael Heise

Weertschop un Infrastruktur

De gröttste Rull speelt de Weertschop in'n Noorden vun den Landkreis in den Speckgördel üm Bremen ümto. Dor liggt de gröttsten Gemeenden un Städer vun den Kreis: Stuhr, Weyhe un Syke. In de groten Bedrievenparks gifft dat allerhand Grootmarkten vun bekannte Ünnernehmen as IKEA. In'n Süden na Noordrhien-Westfalen to warrt mehr Bueree bedreven, ofschoonst dat in de Samtgemeende Ooltamt Lemförde vunwegen de groten Industriebedrieven ZF Lemförder Fahrwerktechnik un Elastogan (höört to de BASF-Grupp) bannig veel Arbeitsplätz gifft.

Verkehr

Dör den Landkreis löppt de A 1 vun Bremen na Ossenbrügge. An dat Autobahndreeck Stuhr schall tokünftig de A 28 na Ollnborg un de Nedderlannen anslaten weern.

Scholen

4 Kooperative Gesamtscholen mit al Schooltwiegen, wo en wieter up lehren kann (twee in Weyhe un twee in Stuhr)

5 Gymnasien (in Deefholt, Twustern, Sulingen, Syke, Brooksen-Vilsen)
4 Hööftscholen (in Deefholt, Sulingen, Syke, Bassen)
4 Realschulen (in Deefholt, Sulingen, Syke, Bassen)
10 Hööft- un Realscholen (in Karkdörp, Lemförde, Swabern, Ehrenborg, Varrel, Twustern, Barnstrup, Brooksen-Vilsen, Rehrn, Wagenfeld)

2 Beroopscholen (in Deefholt (mit Butenstell in Bassen un Sulingen), Syke

Volkshoochschool (Hööftstell Syke)

Kultur

Üm allens, wat de Kultur angeiht, kümmert sik de Landschopsverband Werser-Hunte, de Vereen „Kunst in de Provinz“, de Kreismusikschool, de Städer un Gemeenden ehr Beupdragten för Kultur, de Karkengemeenden, de Kreisspoorkass un allerhand private Gruppen un Verenen, as de Heimat-, Umwelt- un Kulturvereen „Eule“ e.V. in Swarm, de Kulturvereen Sulingen e.V., „Jazz Folk Klassik in Syke e.V.“, „Rüttelschuh in der Wassermühle e.V.“ in Syke-Barrien, „KunstVereinSyke e.V.“ u. a.

Vun 1989 af an hett de Landkreis den Kulturpries vun den Landkreis Deefholt utschreven. Dor will he Künstlers un anner Lüde ut de Gegend mit föddern, de sik mit Kultur befaten doot. Ok könnt se den Pries tospraken kriegen, wenn se sik dat mit jem ehr Levenswark verdeent hefft.

Dat „Kreisarchiv Landkreis Deefholt“ is dat Archiv vun de Verwalten vun düssen Landkreis, sotoseggen ehr Gedächtnis. Dor staht Akten vun 1770 af an, Karten, Urkunnen (vun 1458 af an), Nalatenschoppen un ole Utgaven vun de Dagblöer ut de Gegend. Schöler, Studenten, Lüde vun de Wetenschop un Schrieverslüde könnt sik dat dor ankieken. Ünnerbröcht is dat Archiv in de ole School för Landweertschop, nich wiet af vun den Deefholter Bahnhoff.